លោក ណុប សារ៉ាក់ អ្នកនាំពាក្យស្នងការខេត្តសៀមរាប៖ អាជ្ញាធរនឹងចុះស្រាវជ្រាវករណីកុមារដែលសាច់ញាតិនាំទៅរស់នៅក្នុងចម្ការលោក ខឹម វាសនា
អាសយដ្ឋានទីស្នាក់ការអង្គភាព សារព័ត៌មាន វណ្ណ សំរេច រស្មី បាភ្នំ www.k-vansamrachreaksmeybaphnom.com.kh ស្ថិតនៅក្នុងភូមិ១ សង្កាត់លេខ១ ក្រុងព្រះសីហនុ ខេត្តព្រះសីហនុ / Phone 012 835 006 ។​ សូមអរគុណ...!
គេហទំព័រ (www.k-vansamrachreaksmeybaphnom.com.kh) យើងខ្ញុំ សូមស្វាគម បងប្អូនប្រិយមិត្ត ទាំងអស់ដែលបានចូលរួមអានព័ត៌មានផ្សេងៗ នៅក្នុងគេហទំព័រយើងខ្ញុំ សូមគោរពជូនពរដល់បងប្អូន អោយជួបប្រទះតែសេចក្តី សុខសេចក្តីចំរើនគ្រប់ៗគ្នា នឹងពុទ្ធពរទាំងឡាយ ៤ ប្រការគឺ៖ អាយុ វណ្ណៈ សុខៈ ពលៈ កំុបីឃ្លាងឃ្លៀតឡើយ ។ "សូមអរគុណ

លោក ណុប សារ៉ាក់ អ្នកនាំពាក្យស្នងការខេត្តសៀមរាប៖ អាជ្ញាធរនឹងចុះស្រាវជ្រាវករណីកុមារដែលសាច់ញាតិនាំទៅរស់នៅក្នុងចម្ការលោក ខឹម វាសនា

 


សៀមរាប៖ ម្ដាយចំនួន៣នាក់បានបង្ហាញការព្រួយបារម្ភចំពោះសុខទុក្ខកូនៗរបស់ខ្លួន ដែលត្រូវបានប្ដីនាំទៅរស់នៅក្នុងចម្ការលោក ខឹម វាសនា ស្ថិតក្នុងក្រុងរុនតាឯក ខេត្តសៀមរាប ដោយពួកគេអះអាងថា មិនអាចចូលទៅជួបកូនបាន និងមានការព្រួយបារម្ភអំពីសុខភាព ការរស់នៅ ព្រមទាំងឱកាសទទួលបានការអប់រំរបស់កុមារ។


តាមការផ្សព្វផ្សាយរបស់ទំព័រហ្វេសប៊ុក PS News នៅថ្ងៃទី១ ខែវិច្ឆិកា អ្នកស្រី សូ ណាត បានប្រាប់អ្នកសារព័ត៌មានថា បងប្រុសរបស់អ្នកស្រីបាននាំកូនស្រីអាយុ១១ឆ្នាំ ឈ្មោះ ស៊ាង សុជាតា ចូលទៅក្នុងចម្ការលោក ខឹម វាសនា ហើយអ្នកស្រីបានខានជួបកូនអស់រយៈពេលជិត៤០ថ្ងៃមកហើយ។

អ្នកស្រី សូ ណាត បានឱ្យដឹងថា កន្លងមក អ្នកស្រីធ្លាប់ស្នើសុំចូលទៅជួបកូនស្រីនៅក្នុងចម្ការនោះ ប៉ុន្តែមិនទទួលបានការអនុញ្ញាតឡើយ។


ជាមួយគ្នានេះ នៅថ្ងៃដដែល គណនីហ្វេសប៊ុកឈ្មោះ Tea Rea ក៏បានបង្ហោះសំណេរអះអាងថា កូនៗរបស់ខ្លួនបានទៅរស់នៅក្នុងចម្ការលោក ខឹម វាសនា អស់រយៈពេលជាង១ឆ្នាំហើយ។ អ្នកស្រីបានលើកឡើងថា កូនៗធ្លាប់ប្រាប់តាមទូរស័ព្ទថា ចង់ជួបម្ដាយវិញ ប៉ុន្តែអ្នកស្រីអះអាងថា មិនអាចចូលទៅជួបកូនបាន ទោះបីជាធ្លាប់ធ្វើដំណើរទៅដល់ទីតាំងនោះក៏ដោយ។


អ្នកស្រី Tea Rea បានបញ្ជាក់ថា ប្ដីរបស់អ្នកស្រីជាអ្នកនាំកូនៗចូលទៅក្នុងចម្ការខាងលើ។


ដោយឡែក ស្ត្រីម្នាក់ទៀតក៏បានផ្ដល់បទសម្ភាសជាមួយអ្នកសារព័ត៌មាន ដោយអះអាងថា កូនប្រុសរបស់ខ្លួនចំនួន២នាក់ មានអាយុ៧ឆ្នាំ និង៩ឆ្នាំ ត្រូវបានប្ដីនាំទៅរស់នៅក្នុងចម្ការលោក ខឹម វាសនា អស់រយៈពេលប្រមាណ៧ខែមកហើយ។


តាមការលើកឡើងរបស់ម្ដាយទាំង៣នាក់ ពួកគេសុទ្ធតែមានការព្រួយបារម្ភចំពោះសុខភាព សុវត្ថិភាព និងលក្ខខណ្ឌនៃការរស់នៅរបស់កូនៗ ព្រមទាំងបង្ហាញក្ដីនឹករលឹក និងបំណងចង់ជួបកូនឡើងវិញ។ ជាពិសេស ពួកគេចង់ឱ្យកូនៗបានចេញមកក្រៅ និងមានឱកាសបន្តការសិក្សានៅតាមសាលារៀនដូចកុមារដទៃទៀត។


លោក ណុប សារ៉ាក់ អ្នកនាំពាក្យស្នងការដ្ឋាននគរបាលខេត្តសៀមរាប បានឱ្យដឹងថា លោកទើបតែបានឃើញព័ត៌មាននេះតាមបណ្ដាញសង្គម ខណៈពេលនោះលោកកំពុងបំពេញបេសកកម្មនៅតំបន់បឹងទន្លេសាប ដូច្នេះមិនទាន់បានចាត់ក្រុមការងារចុះស្រាវជ្រាវនៅឡើយទេ។

លោកបានបញ្ជាក់ថា បន្ទាប់ពីបញ្ចប់បេសកកម្ម និងត្រឡប់ទៅវិញ លោកនឹងស្រាវជ្រាវឱ្យបានច្បាស់លាស់ថា តើករណីនេះមានដំណើរការយ៉ាងដូចម្ដេច មានបញ្ហាអ្វីខ្លះ និងអាជ្ញាធរមូលដ្ឋានបានចាត់វិធានការយ៉ាងណាហើយ។


លោក ណុប សារ៉ាក់ ក៏បានអំពាវនាវដល់ប្រជាពលរដ្ឋដែលជួបបញ្ហា ឬមានការព្រួយបារម្ភពាក់ព័ន្ធនឹងសមាជិកគ្រួសាររបស់ខ្លួន សូមដាក់ពាក្យបណ្ដឹង ឬសំណើសុំអន្តរាគមន៍ទៅកាន់សមត្ថកិច្ច ដើម្បីឱ្យអាជ្ញាធរមានមូលដ្ឋានចុះស្រាវជ្រាវ និងស្វែងរកដំណោះស្រាយសមស្រប។

លោកបានបន្ថែមថា កន្លងមកក៏មានប្រជាពលរដ្ឋស្នើសុំឱ្យសមត្ថកិច្ចជួយអន្តរាគមន៍ និងដោះស្រាយបញ្ហាផ្សេងៗដែលពាក់ព័ន្ធនឹងទីតាំងចម្ការលោក ខឹម វាសនា ហើយសមត្ថកិច្ចក៏ធ្លាប់បានចូលរួមជួយអន្តរាគមន៍ផងដែរ។


គួរបញ្ជាក់ថា ករណីនេះនៅមិនទាន់មានលទ្ធផលស្រាវជ្រាវជាផ្លូវការពីសមត្ថកិច្ចនៅឡើយទេ។ ដូច្នេះ ការបញ្ជាក់អំពីស្ថានភាពជាក់ស្ដែងរបស់កុមារ និងមូលហេតុដែលមិនអាចជួបជុំជាមួយឪពុកម្ដាយបាន គួររង់ចាំការស្រាវជ្រាវ និងការបំភ្លឺពីគ្រប់ភាគីពាក់ព័ន្ធ ដោយផ្ដោតសំខាន់លើសុខុមាលភាព សុវត្ថិភាព និងឧត្តមប្រយោជន៍របស់កុមារជាចម្បង៕

Post a Comment (0)
Previous Post Next Post