រាជធានីភ្នំពេញ៖ ក្នុងនាមជាប្រជាពលរដ្ឋខ្មែរ និងជាអ្នកដឹកនាំអង្គភាពព័ត៌មាន លោក ទេស វិបុល ប្រធានសមាគមសេរីភាពអ្នកព័ត៌មានកម្ពុជា បានចេញមុខប្រកាសគាំទ្រ និងកោតសរសើរយ៉ាងខ្លាំងចំពោះ លោក ឆុំ ដានី ចំពោះការសម្រេចចិត្តដ៏ក្លាហាន និងមានប្រយោជន៍ដល់សង្គម ក្នុងការដាក់ពាក្យស្នើសុំអន្តរាគមន៍បន្ទាន់ទៅកាន់ក្រសួងអប់រំ យុវជន និងកីឡា។
ការគាំទ្រនេះ ធ្វើឡើងបន្ទាប់ពី លោក ឆុំ ដានី បានដាក់លិខិតផ្លូវការស្នើសុំឱ្យក្រសួងអប់រំជួយពិនិត្យ ស្រាវជ្រាវ និងចាត់វិធានការចំពោះការបន្លំប្រើប្រាស់គោរមងារអប់រំ និងរដ្ឋបាលដូចជា «បណ្ឌិត» និង «សាស្ត្រាចារ្យ» ដោយគ្មានមូលដ្ឋានច្បាស់លាស់ ដែលកំពុងប៉ះពាល់ដល់តម្លៃនៃការអប់រំ និងកិត្យានុភាពធនធានមនុស្សនៅកម្ពុជា។
លោក ទេស វិបុល បានបង្ហាញនូវស្មារតីសហការ និងការគាំទ្រយ៉ាងមុតមាំ ដោយបញ្ជាក់យ៉ាងដូច្នេះថា៖
«ខ្ញុំបាទ ទេស វិបុល ជាប្រជាពលរដ្ឋខ្មែរមួយរូប សូមគាំទ្រ និងកោតសរសើរ លោក ឆុំ ដានី ដាក់ពាក្យស្នើសុំអន្តរាគមន៍បន្ទាន់ ទៅកាន់ក្រសួងអប់រំ ដើម្បីទប់ស្កាត់ការបន្លំប្រើប្រាស់គោរមងារ “បណ្ឌិត” និង “សាស្ត្រាចារ្យ” ក្លែងក្លាយ»។
សេចក្តីប្រកាសគាំទ្រពីសំណាក់ប្រធានសមាគមសេរីភាពអ្នកព័ត៌មានកម្ពុជារូបនេះ ត្រូវបានគេមើលឃើញថាជាកម្លាំងចិត្ត និងជាសំឡេងដ៏មានសារៈសំខាន់មួយទៀតក្នុងការជំរុញឱ្យស្ថាប័នមានសមត្ថកិច្ច ក៏ដូចជាសាធារណជន បង្កើនការប្រុងប្រយ័ត្ន និងចូលរួមទប់ស្កាត់រាល់សកម្មភាពបោកប្រាស់ ឬការបន្លំយកស្លាកយីហោអប់រំខុសច្បាប់ ដែលប៉ះពាល់ដល់ផលប្រយោជន៍សង្គមជាតិទាំងមូល៕