ខេត្តកំពង់ស្ពឺ៖ ឧបទ្ទវហេតុដ៏គួរឱ្យរន្ធត់និងសោកស្តាយមួយបានកើតឡើង ដោយសារគ្រោះធម្មជាតិរន្ទះបាញ់ បណ្តាលឱ្យយុវជនម្នាក់បានបាត់បង់ជីវិតភ្លាមៗនៅនឹងកន្លែង ក្នុងអំឡុងពេលអាកាសធាតុប្រែប្រួលមានភ្លៀងធ្លាក់។
យោងតាមប្រភពព័ត៌មានបានឱ្យដឹងថា ហេតុការណ៍នេះបានកើតឡើងនៅថ្ងៃទី ២៣ ខែមិថុនា ឆ្នាំ ២០២៦ ស្ថិតនៅចំណុចវាលស្រែ ក្នុងភូមិចាន់ពីង ឃុំត្រពាំងជោ ស្រុកឪរ៉ាល់ ខេត្តកំពង់ស្ពឺ។ ជនរងគ្រោះដែលបានស្លាប់បាត់បង់ជីវិត មានឈ្មោះ ខាវ ខេ (ហៅបាវ) ភេទប្រុស អាយុ ១៦ ឆ្នាំ។
នៅកន្លែងកើតហេតុ បានបង្ហាញឱ្យឃើញថាសពជនរងគ្រោះបានដួលសន្លប់បាត់បង់ជីវិតនៅក្នុងថ្លុកទឹកកណ្តាលវាលស្រែ ខណៈដែលមានបងប្អូនប្រជាពលរដ្ឋ និងសាច់ញាតិជាច្រើននាក់ បានមកជុំជុំគ្នាទាំងក្តីក្តុកក្តួល និងសោកសង្រេកជាពន់ពេកចំពោះការបាត់បង់សមាជិកគ្រួសារក្នុងវ័យក្មេងខ្ចីបែបនេះ។
ក្រោយកើតហេតុ អាជ្ញាធរមូលដ្ឋាន និងសមត្ថកិច្ចបានចុះទៅពិនិត្យ ដើម្បីរៀបចំធ្វើកំណត់ហេតុ និងប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី។
ឆ្លៀតក្នុងឱកាសនេះផងដែរ អាជ្ញាធរក៏ដូចជាអ្នកជំនាញតែងតែអំពាវនាវដល់បងប្អូនប្រជាពលរដ្ឋទាំងអស់ សូមមានការប្រុងប្រយ័ត្នខ្ពស់នៅពេលមានភ្លៀងធ្លាក់ ផ្គរ រន្ទះ ដោយជៀសវាងការដើរទៅទីវាលចំហ ឬជ្រកក្រោមដើមឈើធំៗ ដើម្បីការពារសុវត្ថិភាពអាយុជីវិតផ្ទាល់ខ្លួន និងក្រុមគ្រួសារ៕
